Lajme nga Sporti

Tirana thellon krizën e Teutës

Ndeshja e golave me kokë. Kështu mund të konsiderohet takimi Tirana-Teuta (2-1), kur edhe Haliti për durrsakët në minutën e 4-të, i ndihmuar edhe nga Jahmir Hyka, i cili në tentativë për ta larguar topin e zhyti në rrjetë, por edhe Daniel Xhafaj në të 39’ dhe Indrit Fortuzi në të 51’ i shënuan golat po me kokë.
HALITI-HYKA
Atmosferë e ftohtë në shkallët e stadiumit “Qemal Stafa”, rreth 300 shikues. Haliti i Teutës dha një goditje paralajmëruese në minutën e 2-të, kur Nallbani arriti ta presë topin pas dy ndërhyrjeve. Goditje këndi për durrsakët dhe Haliti me kokë nuk fali duke realizuar në portën e Nallbanit në minutën e 4-t, i ndihmuar edhe nga tentativa e futbollistit të Tiranës, shtatshkurtrit Hyka, i cili e devijoi topin në rrjetë. Ky ishte dhe goli i parë i kosovarit , i cili ka luajtur në Australi me Njukasëll Xhets. Durrsakët luajtën më të mobilizuar njëzet minutat e para, përjashtuar rastin sporadik të sulmuesit të Tiranës, Daniel Xhafaj, i frenuar me zgjuarsi nga Xhevair Kapllani në minutën e 18-të. Sulmuesi Abazaj dhe mesfushori Çapaj patën dy mundësi të mira për Tiranën, por kapiteni i Teutës, Kapllani, ishte në një ditë shumë të mirë. Abazaj, Hyka ishin në garë se kush do të humbiste raste më shumë.
XHAFAJ – FORTUZI
Klodian Duro hodhi mjeshtërisht një top brenda zonës së vogël, dhe po më këtë klas Xhafaj shënoi me kokë në portën e ish-skuadrës së tij gjatë sezonit të kaluar, duke barazuar rezultatin në minutën e 39-të, që mbylli edhe pjesën e parë me rezultat të barabartë 1-1. Goli i parë i vlonjatit Xhafaj në kampionat. Minutat e mbetura të pjesës së parë folën tërësisht për bardheblutë, ashtu si fillimi i pjesës së dytë, kur Indrit Fortuzi po me kokë shënoi golin e dytë në minutën e 51-të, duke realizuar golin e dytë për Tiranën në këtë takim, por dhe të dytin personal gjatë dhjetë ndeshjeve të para. Tirana diktoi plotësisht pjesën e dytë ndaj një Teutë të lodhur dhe në krizë të plot duke pësuar humbjen e shtatë në dhjete javët e para. Tirana pas krizës së javëve të para, duket qartë se e ka marrë veten edhe falë kontributit të trajnerit Hafizi.
KONFLIKTI I ABAZAJT
Tekniku bardheblu e hodhi në fushë nga minuta e parë, ish-sulmuesin e Kastriotit, Orjand Abazaj, por ky i fundit humbi shumë raste të pastra shënimi, çka provokoi edhe nervozizmin e tifozerisë së pakët bardheblu të pranishme në “Qemal Stafa”. “Ultrasit” kërkuan në korr zëvendësimin e tij dhe lojtari shkëmbeu disa batuta aspak të hijshme me ta. Më fillimin e pjesës së dytë, Hafizi e zëvendësoi atë me veteranin Indrit Fortuzi, i cili rezultoi efikas, pasi shënoi edhe golin e fitores ndaj durrsakëve.



Skeda e ndeshjes
Tirana-Teuta 2-1
Shënues: Xhafaj 39’, Fortuzi 51’/ Haliti 4’
E mërkurë, 7 nëntor 2007, stadiumi kombëtar “Qemal Stafa”
Tirana: Nallbani, Sina, Dede, Vrapi, Fagu, Sefa, Hyka, Çapja, Duro (Merkoçi 85’), D. Xhafaj (Arapi 69’), Abazaj (Fortuzi 46’). Trajner: Astrit Hafizi.
Teuta: Kapllani, Dushku, Likmeta, Stafa, Hodo (Dragusha 70’), Buna, Vila, Haliti, Hysa, Lamaj, Çota (Ismail 68’). Trajner: Gentian Begeja.
Gjyqtarë: T. Latifi, A. Lamçe, G. Qirici.
Kartonë të verdhë: -
Kartonë të kuq: -

Trajnerët
Hafizi: “Jam i kënaqur vetëm me rezultatin”
Trajneri i Tiranës, Astrit Hafizi u shpreh pas takimit: “Unë jam i kënaqur vetëm me rezultatin sot, por kam rezervat për lojën, pasi jam i bindur se grupi ka forca më shumë për të reaguar. Mund të kishim luajtur dhe më mirë, por gjithsesi, e rëndësishme është që fituam dhe konfirmojmë qëndrueshmëri. Pozitivja për ne lidhej me reagimin mjaft pozitiv të skuadrës, e cila, edhe pse në disavantazh të një goli, arrin të gjejë barazimin dhe lufton e kalon në epërsi, duke pasur vullnet për marrje rezultati pozitiv, pra fitores. Duhet thënë se sot sulmi u zhbllokua më në fund dhe kjo është diçka tjetër shumë e mirë për ne.”

Begeja: “Teuta do të qëndojë në Superiore”
Trajneri i Teutës, Gentian Begeja u shpreh pas takimit me Tiranën: “Ekipi sot luajti mirë. Ndryshe nga dy ndeshjet e kaluara, lojtarët e mi sot bënë një tjetër performancë dhe kishin dëshirë që të merrnin rezultat pozitiv. Por përballë patëm një ekip të fortë që përmbysi avantazhin tonë dhe fitoi takimin. Na mungon eksperienca dhe kjo është mangësia jonë më e madhe. Shpresojmë që në ndeshjen e radhës të arrijmë tek fitorja. Besoj se Teuta do të gjejë mundësitë për të qëndruar në Kategorinë Superiore”.

“Demat”, të rraskapitur edhe ndaj Dinamos

Një pikë nga nëntë të mundshmet dhe dy humbjet në tri takimet e fundit e spostuan Partizanin në vendin e tretë, por me pikë të barabarta me Dinamon (nga 20). Partizani humbi në javën e 10-të me Dinamon me rezultatin e pastër 2-0 (gola të Plakut në të 51’ dhe Pejiçit në të 63’). Trajneri i bluve, Agim Canaj e kishte thënë se kundër Partizanit i mjaftonte edhe një gjysmëgoli që do ta çonte te fitorja dhe ta barazonte me pikë me Partizanin që e nisi ndeshjen si kryesues.
KRIZË ? -Partizani i Likës duket se po përjeton krizën e dytë gjatë “Katër javëve të mëdha”: humbje me Besën (2-1), barazim 0-0 me Elbasanin dhe sërish humbje me Dinamon (2-0), kur në javën e fundit të fazës së parë e pret kampionia në fuqi, Tirana, që duket se e klaloi krizën nga ana e saj, kur djemtë e Hafizit arritën fitoren e dytë rresht.
ATMOSFERA – Më e bukura e parë ndonjëherë në “Selman Stërmasi” gjatë këtij sezoni Në praninë e rreth 2000 shikuesve në “Selman Stërmasi” nisi edhe derbi i 128-të midis Dinamos dhe Partizanit, kur në atë “Qemal Stafa” në takimin Tirana-Teuta, nuk ishin më shumë se 300 shikues. Dhe të mendosh se aty luanin kampionia dhe nënkamponia në fuqi. Gjithsesi një derbi si ai Dinamo-Partizani, e meritonte të ndiqej.
SHTYLLA - Në minutën e 14-të Bakaj dha një pasim të zgjuar për Abilaliaj, por sulmuesi vlonjat nuk mundi të mposhtë Kotorin e Dinamos. Sulmuesi i Dinamos, Bekim Kuli siluroi i pari portën e kuqe të mbrojtur si zakonisht nga Orges Shehi. Loja merr më shumë grintë e ngjyrë. Mbrojtësi i Partizanit, Tefik Osmani u ndëshkua më karton të verdhë për ndërhyrje të rëndë ndaj Pejiç. Dinamo ka rastin e parë të madh, kur goditi shtyllën me anë të kroatit Dario Bodrusiç, por Plakun nuk gjuajti fort topin e kthyer nga shtylla. Dario Bodrusiç u ndëshkua me karton të verdhë për protestë ndaj gjyqtarit Kridens Meta. Kroati Goran Vinçetiç shmangu në minutën e 31-të mbrtojtësin Fatjon Tafaj të Partizanit, gjuajti fort duke e detyruar Shehin ta presë topi në dy kohë. Pjesa e parë ofroi për shikuesit në “Selman Stërmasi” një lojë mesatare dhe larg formës së disa prej futbollistëve elitarë.
GOLAT - Fraksioni i dyte i ndeshjes paraqiti një Partizan të shthyrur plotësisht dhe të papërgatitur nga ana fizike dhe në rënien e moralit të “demave” ndikoi edhe goli i shpejtë i sulmuesit të Dinamos, Sabino Plaku (50’), një prodhim i Akademisë së Partizanit. Ish-sulmuesi i Apolonisë u ngjit në kuotën e katër golave. Në kërkim të golit të barazimit të kuqtë pësuan edhe golin e dytë me anë të Pero Pejiç, që me golin e shënuar në minutën e 63-të, jo vetëm që e çoi rezultatin në 2-0, por realizoi edhe golin e tij të pestë sezonal. Partizani nuk pati forcën e duhur të reagojë dhe të “Kuqtë” mund të ndëshkoheshin
edhe me gola të tjerë. Kjo ishte një humbje e rëndë për “demat”, që do të bëjnë edhe pa shërbimet e mbrojtësit Tefik Osmani në ndeshjen e rëndësishme me Tiranën, të shtunën e arsdhshme, ndeshje që mbyll edhe fazën e parë. Gjithsesi, Partizani mund të mburret vetëm me faktin se ka 7 fitore me shumë se Dinamo (38) gjatë historisë së 128 ndeshjeve të tyre.

Dinamo – Partizani 2-0
Golat: 51’ Plaku, Pejiç 63’
Dinamo: Kotorri; Abraham, Graniç, Pisha, Bodrusiç; Kuli (77’ Ferra), Allmuça, Poçi, Vincetiç (69’ Mile); Plaku (88’ Çaushi), Pejiç
Trajner: Agim Canaj
Partizani: Shehi; Hallaçi, Osmani, Tafaj, Beqiri; Gjyla (57’ Progri), Babamusta (58’ Shkëmbi), Devolli, Muzaka; Bakaj, Abilaliaj (68’ Malindi)
Trajner: Hasan Lika
Gjyqtar: K.Meta, A.Mali, E.Doda
Karton i verdhë: Bodrusiç, Allmuça, Pejiç/Osmani
Karton i kuq: Abraham 90’

Tranerët
Agim Canaj (Dinamo)
“Strategjia sipas të cilës kishim përgatitur ndeshjen ishte duke ushtruar presion në mesin e fushës së Partizanit, për ta kapur më pas në kundërsulm. Besoj se ia dolëm mbanë me sukses këtij qëllimi. Me këtë fitore treguam se jemi një ekip plot potencial. Pavarësisht nga zërat që shkojnë e vijnë, ne jemi në garë për titull”.

Hasan Lika (Partizani)
“Ishte një fitore e merituar e Dinamos. Ne kemi luajtur një lojë aspak të mirë dhe si rrjedhojë e kësaj jemi ndëshkuar dy herë. E madje fitorja mund të ishte edhe më e thellë, pavarësisht tentativave tona për të shkurtuar diferencën e rezultatit. Mendoj se skuadra nuk dha atë që ka dhënë në fillim të këtij kampionati”.


Besa-Besëlidhja 2-0
Besa morri kryesimin e vetme në javën e 10-të, kur fitoi me Besëlidhjen (2-0) dhe përfitoi nga hapi i gabuar i Partizanit me Dinamon. Pjesa e parë shfaqi një Besë më kërkuese për golin, por bashkëkryesuesit ishin të paqartë dhe të turbullt para portës. Kavajasit realizuan dy gola në pjesën e dytë për të vulosur edhe fitoren.

Flamurtari-Kastrioti 1-0
Vlonjatët agresivë përballë një mbrojtje të ngjeshur të Kastriotit. Portieri Mustafa i Kastriotit ndërhyri në mënyrë të parregullt ndaj të riut Shehaj dhe gjyqtari Janku nuk hezitoi të drejtonte dorën nga pika e bardhë. Denis Mema goditi saktësisht 11-metërshin në minutën e 31-të duke sjellë edhe avantazhin e Flamurtarit.


Kategoria Superiore

Java 10, 07.11.2007
Dinamo-Partizani 2-0
Besa-Besëlidhja 2-0
Tirana-Teuta 2-1
Flamurtari-Kastrioti 1-0
Skëndërbeu-Vllaznia 2-3
Elbasani-Shkumbini 0-0

Java 11, 10.11.2007
Partizani-Tirana
Shkumbini-Dinamo
Besëlidhja-Elbasani
Vllaznia-Besa
Kastrioti-Skënderbeu
Teuta-Flamurtari

Ekipi N F B H Gol P
1.Besa 10 7 2 1 15-6 23
2.Dinamo 10 6 2 2 14-4 20
3.Partizani 10 6 2 2 15-6 20
4.Vllaznia 10 4 4 2 14-9 16
5.Flamurtari 10 4 4 2 8-6 16
6.Shkumbini 10 4 3 3 10-10 15
7.Elbasani 10 3 5 2 6-4 14
8.Kastrioti 10 2 1 5 7-9 10
9.Tirana 10 3 3 4 10-11 12
10.Besëlidhja 10 1 3 5 11-15 9
11.Teuta 10 1 2 7 5-15 5
12.Skënderbeu 9 1 1 8 13-27 4

Ideja e Kovaçiçit: Dua të drejtoj një klub shqiptar


Slavko Kovaçiç, zv/trajneri kroat i Kombëtares shqiptare, po projekton që të punojë gjatë në futbollin shqiptar, madje jo vetëm me Kombëtaren, por edhe në kampionatin tonë. “Unë do t’i paraqes presidentit të FSHF-së idenë që përpos pozicionit tim në Kombëtare si asistent i Bariçit, të mund të punoj edhe si drejtues i një prej skuadrave të kampionatit shqiptar. Në këtë mënyrë 75% të kohës do të jem në Shqipëri ku do t’i ndjek nga afër të gjitha ndeshjet e kampionatit shqiptar, lojtarët e rinj dhe do të bisedoj njëkohësisht me trajnerët e Kombëtareve U-19 dhe U-21. Për këtë gjë kam folur edhe me Bariçin, i cili është plotësisht dakord. Unë kam dëshirë të drejtoj një skuadër shqiptare, e cila më jep mundësinë që të marr pjesë rregullisht në Kupat e Evropës dhe jo të skualifikohet që në turin e parë”, ka thënë Kovaçiç për “Panorama Sport”. Kovaçiç ka sqaruar se deri tani nuk ka asnjë tratativë konkrete me ndonjë klub të Superligës, por shpreson se në të ardhmen do t’i jepet mundësia që ai të marrë drejtimin e një skuadre shqiptare. “Dua të jemi të qartë se kjo që po them është projekti dhe dëshira ime, sepse deri tani nuk ka pasur bisedime me klube të kampionatit shqiptar”, është shprehur ai. Pak kohë më parë Kovaçiç u shpreh se do të bisedonte personalisht me presidentin Duka në lidhje me kontratën e tij dhe të ardhmen e tij si zëvendës i Bariçit, duke lënë të kuptonte se nuk do të ishte Oto, ai që do të vendoste për termat e kontratës së tij. Nuk kam folur me Dukën, por të hënën e ardhshme do të vij në Tiranë për të biseduar për këtë gjë dhe shpresoj që Duka të ketë 30 minuta kohë për të biseduar me mua. Por, për një gjë jam shumë i sigurt: jam gati të punoj përkrah Bariçit, pasi atë e njoh prej shumë kohësh si edhe kam shumë dëshirë që të punoj për Kombëtaren shqiptare. Kam bindjen se do të gjejmë gjuhën e përbashkët me presidentin e FSHF-së në lidhje me rinovimin e kontratës time”, ka thënë Kovaçiç. Ai ka përjashtuar mundësinë që të ketë surpriza të orëve të fundit, duke thënë se Bariç, tashmë e ka arritur akordin me FSHF-në dhe se pritet vetëm zyrtarizimi. “Nuk besoj se gjërat mund të ndryshojnë, sepse nga burimet e mia kam mësuar se akordi ka qenë shumë serioz dhe shumë shpejt do të zyrtarizohet”, tha tekniku.

Kontrata I kënaqur, nëse i ofrohet e njëjta pagë

Zv/trajneri i Kombëtares është i gatshëm që të punojë me të njëjtën pagë që merr aktualisht te kuqezinjtë. Kroati përfiton rreth pesë mijë euro në muaj dhe do të ishte i gatshëm që të pranonte të njëjtën shifër. Për mua, ana financiare mbetet në plan të dytë – ka thënë tekniku. - Do të isha i gatshëm që të punoja me të njëjtat kushte, përfshi këtu edhe termat financiarë. Megjithatë, kjo mund të zgjidhet në një mënyrë tjetër, pra nëse unë arrij të që marr drejtimin e një skuadre shqiptare”.

Të hënën, bisedime me Dukën për rinovimin e kontratës

Kovaçiç ka thënë se do të do të vijë në Tiranë ditën e hënë dhe do të kërkojë një takim me presidentin e Federatës Shqiptare të Futbollit, Armand Duka. Ai ka pohuar se do t’i kërkojë kreut të FSHF-së që vendosin pikat mbi “i” përsa i përket rinovimit të kontratës si zv/trajner i Kombëtares dhe planeve të tij për të marrë drejtimin e një skuadre tjetër. “Nuk kam folur me Dukën, por të hënën e ardhshme do të vij në Tiranë për të biseduar për këtë gjë dhe shpresoj që Duka të ketë 30 minuta kohë për të biseduar me mua”, ka thënë trajneri.

Bariç: Do të fitojmë me Bjellorusinë

Bledar KUKA

Ndonëse nuk e quan veten “optimist tipik kroat”, Oto Bariç është i bindur se Shqipëria do të marrë 3 pikët ndaj Bjellorusisë në Euro 2008. Trajneri kroat i shqiptarëve nuk do të jetë në stol më 17 nëntor, pasi UEFA e ka pezulluar për 3 ndeshje, megjithatë ai është optimist. “Ndihmësi im, Sllavko Kovaçiç, kupton shumë mirë çdo mendim timin, - tha trajneri me përvojë për “Veçernji Listin”, - me të nuk do të ketë asnjë problem dhe jam i bindur se do ta fitojmë atë ndeshje (ndaj Bjellorusisë)
99 herë “Oto Nacionale”
Gazeta kroate informon se takimi ndaj Bjellorusëve, në kuadër të grupit G eleminator, do të jetë i 99-ti në karrierën e Herr Otos si trajner i një skuadre përfaqësuese. Pra 99 herë “Oto Nacionale” për njeriun që quhet edhe “Oto Maksimale”, ndër të cilat 14 i ka si trajner i Shqipërisë. Kuptohet, “Veçernji” nuk harron të theksojë se këtë herë Bariç do të jetë në tribunë, duke drejtuar takimin me aparatin celular (mobitelin), por nuk do të mund të “fshihet” me tifozëve, sepse Shqipëria do ta luajë ndeshjen pa tifozë (në fakt duhet pritur apeli i FSHF-së).
“Pres ulje dënimi”
75-vjeçari ka besim se UEFA do ta pranojë apelimin e bërë nga vetë ai lidhur me dënimin e tij prej 3 ndeshjes, pas përjashtimit me karton të kuq në takimin ndaj Bullgarisë më 18 tetor në “Qemal Stafa”. “Kam bërë ankesë në UEFA për dënimin, - sqaron vetë ai, - shpresoj që të ma shkurtojnë dënimin të paktën një ndeshje, në mënyrë që të jem i pastër për eleminatoret e ardhshme (Botërori 2010)”.
Oto, këshilltar i Dinamos
“Veçernji” njofton se Bariç, ndonëse e zgjati kontratën me FSHF-në, nuk hoqi dorë nga roli jozyrtar i këshilltarit të Dinamos së Zagrebit. Gazetari kroat, që foli me të, ishte shumë i interesuar që specialisti me përvojë të jepte mendimin e tij për ndeshjen që Dinamo do luajë ndaj Bazelit zviceran nesër në Kupën UEFA. “Do të jem në stadium të enjten”, - shprehet Bariçi. Ai shton se nuk ka arritur ende të takojë bashkëpresidentin e Dinamos, Mamiqin, pasi refuzoi të ishte kryeskaut i klubit.
“Ende nuk jam takuar me Mamiqin, - vazhdon ai, - madje as nuk mund t’i ndihmoj shumë Dinamos për këtë ndeshje, sepse kam detyrën të përgatis dy ndeshjet e radhës për Shqipërinë. Sidoqoftë, mund të them se pres një Bazel ambicioz që do të kërkojë të shënojë gol. Nuk do të luajnë bunker, sepse nuk kanë atë stil loje. E përsëris ama që nuk mund t’i jap asnjë thërrime ndihmë trajnerit Ivankoviq për këtë ndeshje”.

“Bllazheviç, optimist kroat”
Bariçi e ka gati një batutë për rivalin e tij të përjetshëm, Mirosllav “Çiro” Bllazheviç. Atij i thonë se “Bllazheviçi ka parashikuar fitore 4-0 të Dinamos ndaj Bazelit”. “Çiro është optimist kroat klasik, - komenton “shqiptari”, - edhe po të luante Kroacia me Argjentinën, ai do të thoshte se kroatët do fitonin 3-0. Unë jam më realist, por do të më pëlqente që Çiro t’i ketë rënë në kokë rezultatit”.
Një shqiptar i zë vendin Hykës te Dinamo
Quhet Anas Sharbini, është me origjinë shqiptare dhe luan për Rijekën në kampionatin kroat. Dinamo e Zagrebit e ka piketuar si pasardhës të Luka Modriqit, në momentin që ky do të largohet për në Perëndim. Vetë Bariç duket se “e ka tradhëtuar” Jahmir Hykën, që e kishte sugjeruar si pasues te kapitenit dinamovit. “Mendoj se Anas Sharbini mund të bëhet Luka i ri dhe te Dinamo këtë e dinë shumë mirë”, - është shprehur Herr Oto.

Shkurt/ Altin Lala, talent edhe në kalërim


Përveçse futbollist shumë i talentuar, Altin Lala, e tregoi veten në Gjermani edhe si kalorës mjaft i mirë. Këtë e njoftoi dje media gjermane “openpr.de”. Shqiptari kuqezi mori pjesë në ditën e fundit të një kampionati hipizmi që u zhvillua në Hanover dhe Lala tregoi aty talentin e tij. Madje mesfushori ishte edhe ndër fituesit në garën që u zhvillua.

Lala, njeriu i ndeshjes në Hanover-Dortmund
Media gjermane e vendosi unanimisht. Altin Lala u shpall Njeriu i Ndeshjes në Hanover-Dortmund, fituar nga “të kuqtë”. Shqiptari, zëvendëskapiten i H96-ës, foli modestisht pas takimit. “Unë dua që të luaj dhe të jap gjithçka, - u shpreh ai për “Noje Presen”, - ndërsa të tjerat nuk më takojnë mua (pra nëse do të jetë sërish titullar”.


Hajduku, në gjyq ish-trajnerin e Dinamos së Tiranës
Luka Bonaçiq është hedhur në gjyq nga Hajduku i Splitit. Media kroate njofton se ish-trajneri i Dinamos, tashmë finalist i Ligës së Kampionëve të Azisë, akuzoi Hajdukun se udhëhiqet nga mafia, ndërsa kohë më parë është goditur e dëmtuar në kokë, ndërsa u shkarkua si trajner i splitasve. Hajduku ka hedhur në gjyq edhe gazetën “Jutarnji List” dhe TV Novon.


Florian Myrtaj shënon në Serinë C1
Sulmuesi shqiptar, Florian Myrtaj realizoi golin e vetëm të Arecos në humbjen 1-3 ndaj Lukezes, në Serinë C1, grupi B (kategoria e tretë italiane). Ish-lojtari i kombëtares shënoi në minutën e 55-të, në takimin e luajtur në Luka.

Rumania “harron” Shqipërinë, mendon Euro 2008-ën
Federata Rumune e Futbollit po mendon goxha për “vendfushimin” e ardhshëm të kombëtares tringjyrëshe në finalet e Kampionatit Europian të vitit të ardhshëm. Këtë e bën me dije “Pro Sporti” që shkruan se zyrtari i lartë i federatës, Ionuc Lupesku, ka piketuar Salcburgun si pikën më të përshtatshme në territorin austriak. Euro 2008 do zhvillohet në Zvicër dhe Austri.

Lorik Cana: Jemi në pozicion të mirë
Kapiteni i Marsejës, Lorik Cana, u shpreh dje se ekipi i tij është në pozicion të mirë për të kaluar fazën e grupeve në Ligën e Kampionëve. “Ne e kemi zakon që e ngremë nivelin e lojës ndaj ekipeve të mëdha, - tha ai, për “uefa.com”, - dhe shpresoj që kjo të vazhdojë. Jemi në pozicion të mirë që të kualifikohemi”. OM luajti mbrëmë me Porton.

Disiplina pezullon 2 javë Luan Deliun

Ish-lojtari i shquar i Elbasanit sot trajner i Sopotit të Librazhdit, Luan Deliu, u pezullua dje për 2 ndeshje nga Komisioni i Disiplinës në FSHF. Bashkë me pezullimin erdhi edhe gjoba prej 30 000 lekësh me arsyetimin për ofendim të gjyqtarit. Sopoti luan në Kategorinë e Dytë. Po në këtë kategori, dënim i ngjashëm iu dha edhe zyrtarit të Çlirimit, Bujar Rizvani.

Krizë Duka-Bariç?

Gjithmonë edhe më shumë dyshime po krijohen në lidhje me fatin e Oto Bariçit në krye të Kombëtares shqiptare edhe për dy sezonet e ardhshme. Pas përgjigjeve të ftohta dhe aspak bindëse të dhëna nga trajneri kroat gjatë konferencës për shtyp, nervozizmit të fshehur të ndihmësve të tij të huaj, Bariç, është duke shijuar edhe një mënjanim të paktën publik nga presidenti i Federatës Shqiptare të Futbollit, Armand Duka, njëherësh edhe njeriu që gëzon të drejtën ekskluzive për zgjedhjen dhe emërimin e trajnerit të Kombëtares. Bosi i FSHF-së është takuar dje lojtarët në rezidencën e tyre ne hotel “Adriatik” në Durrës dhe ka biseduar përzemërsisht me ta për gati një orë e gjysmë, duke shkëmbyer edhe batuta me lojtarë të veçantë. Natyrisht, që Duka nuk i është shmangur aspak takimit edhe me trajnerin e përfaqësueses, por ka folur me të në mes të lojtarëve dhe sipas burimeve të “Albania-sport” nuk ka pasur asnjë bisedim të karakterit “kokë me kokë’. Në fakt, gjithmonë është folur se kroati do ta firmoste kontratën përpara ndeshjes me Bjellorusinë, por ditët deri të shtunën (17 nëntor) janë pakësuar dhe nuk do të ishte çudi, që Bariç të shkonte në shortin e Botërorit 2010 ende pa të zezën (firmën) mbi të bardhë (kontratën).

Bernd Shtanxh: “Duhet të jemi të duruar”

Ndeshja me Shqipërinë është “eksperimenti” i rradhës për Bejllorusisë. Këtë e deklaron vetë trajneri i Bjellorusisë rradhës së kuqezinjve, Bernd Stanxh për faqen zyrtare të UEFA-s, uefa.com. Gjermani shprehet se synimi i tij është që të ndërtojë një skuadër të re: “Ka edhe dy ndeshje për këtë fazë kualifikuese dhe më pas unë premtoj se të gjitha eksperimentet do të mbarojnë”, - shprehet Stanxh, trajneri i dytë i Bjellorusisë gjatë kësaj fushate pas Juri Puntus, ndaj të cilit morrëm edhe barazimin 2-2 në Minsk në ndeshjen hapëse të kualifikueseve.
Tekniku nuk e fshehu faktin se brenda ekipit të tij ekziston një ndjenjë depresioni dhe nervozizmi si pasojë e rrezultateve aspak të mira që ka marrë skuadra që ai. “Unë jam pak nervoz gjithashtu. Ne nuk kemi marrë rrezultate të mira”, - shprehet ai. “Megjithatë unë jam i sigurtë se ato do të vijnë kur ne të ndërtojmë një skuadër të mirë. Ekipi ka potencial. Ne vetëm duhet që të jemi të duruar.” Kështu në ndehsjen e rradhës kuqezintjë do të kenë një mundësi më shumë për të marrë tre pikët, duke pasur parasysh gjendjen brenda skuadrës dhe që ndeshja do të luhet në “Qemal Stafa” përballë tifozerisë së zjarrtë. Dhe vetë Stanxhe pranon se ka një ndjenjë depresioni dhe se atij nuk i interesojnë rezultatet për momentin, por vetëm gjetja e elementëve të rinj. “Ka një farë ndjenje të depresionit sepse ne humbëm dy ndeshje në tetor, por tani për momentin rrezultatet nuk janë edhe aq të rëndësishëm. Ne po ndërtojmë një skuadër, dhe rrezultate do të kenë rëndësi vetëm kur të fillojë turi tjetër për fazën kualifikuese të kampioantit botëror”-vazhdon ai. Për trajnerin kundërshtar e gjithë puna është përqëndruar në eliminatoret e botërorit të 2010. Ai ka gjetur disa nga futbollistët e të ardhmes. “Unë e di se cilët lojtarë do të formojnë shtyllën e skuadrës sonë në fushatën kualifikuese tjetër”-shprehet Stanxh.
Tekniku bjellorus në përballjen e rradhës me Shqipërinë ka marrë edhe tre lojtarë të rinj. “Unë kam tre lojtarë që nuk i kam zgjedhur më parë Aleksandr Kulchiy, Vitali Bulyga dhe Vitali Kutuzov" –shprehet gjermani Dhe sipas tij ata janë lojtarë të talentuar që do të kenë mundësi të tregojën veten në ndeshje me Shqipërinë. Megjithatë synimi i vetëm për “djemtë e Bariccit” janë tre pikët. Përballë do të kenë një ekip që ka ardhur për testin e rradhës në “Qemal Stafa”. Kjo do të jetë një mundësi më shumë për të marrë një fitore përballë publikut kuqezi.

Cana: “Nuk e shihja dot ndeshjen nga TV”

Kapiteni i Olimpikut të Marsejës, Lorik Cana, nuk ka mundur t’u shpëtojë gazetarëve gjatë testit me Kombëtaren U-19. Mesfushori i rikthyer pas dy ndeshjeve pezullim me Slloveninë dhe Bullgarinë ndihet i lumtur: “Ndeshja me Bjellorusinë është shumë e rëndësishme për ne. Jam shumë i kënaqur që u ktheva në Kombëtare pasi nuk e shihja dot nga televizioni. A kam folur me Bariçin? Po. Kam folur por nuk mund të them se çfarë biseduam, sepse këto mbeten mes nesh dhe nuk është nevoja që t’i shprehim në gazeta. Për hir të Kombëtares ne do të bashkëpunojmë dhe duhet të japim të dy maksimumin që të arrijmë objektivat që i kemi vënë vetes